الحياه بقت سريعه جدا وكل يوم بتطلع بجديد بيزيد من أعباء الأسره ولأن الست هي اللي بتضيف المعنى على الحياه واللي غالبا بتكون شايله أعباء كتير بحب وسعاده نابعه من قدرتها على المنح بدون مقابل .. عشان كده ظهرت المشاريع الصغيره من البيت اللي بتكون برأس مال محدود وما تحتجش مكان وبتعتمد في الغالب على ذوق الست او مهاره بتتميز بيها ومع الوقت بتقدر من خلال علاقاتها إنه يسوق نفسه بنفسه وعجلة الإنتاج تمشي و يجيب مصاريفه ..
من أمثلة المشاريع دي :
* عمل الإكسسوارات زي السلاسل والغوايش والدالايات وغالبا بيعتمد على الخامات الموجوده في السوق زي الخرز وممكن حاجات طبيعيه زي الخشب والأحجار والأصداف و سلاسل معدنيه او خيوط ؛ أهم حاجه تكون تصميماتك جديده وتعملي عدد منها وتصوريه وتعمليلها تسويق في الأماكن الي بتكوني موجوده فيها زي الكليه لو كنت لسه طالبه او تنزليها على حسابك على الفيس بوك وتشاركيها مع صحابك
* الطباعه على التي شيرتات وبتكون بإبتكارتصميمات عصريه بتحتاجي تي شيرت قطن وألوان وفرش ؛ بترسمي التصميم وبتلونيه على وش التي شيرت وظهره وممكن تستخدمي اشكال في الطباعه زي القوالب المحفوره اللي بتكون متوفره في السوق او ورق الشجر ممكن تشاركي بإبداعاتك في المعارض الجماعيه ؛ الخبره بتكتسبيها مع الوقت ..
* كمان الأكل البيتي ودا غالبا بعتمد على إنك ليكي نفس في الأكل وميزته إن أدواته بتكون غالبا متوفره في أغلب البيوت المهم هو التسويق واللي غالبا لو شاطره في الأكل بيحصل لوحده .
* بوكيهات الورد للعرايس (جرب ) اللي بتمسكها العروسه في فرحها ..
* تطريز على ملايات السرير والخدديات ..
* تصميم أزياء للبنات والأطفال ويتباع للمصانع ..
* تصميم مواقع للويب وللمدونات ..
* أفكار لأغلفة الكتب ..
* لو ليكي في الكورشيه والكنفاه تعملي أطقم للمواليد بتكون لها رونق خاص ..
وأخيرا ما تخافيش ..الشعور بأنك بتعملي حاجه ببإديكي شعور بإنك بتملكي الكون .
المصدر nooun
